Байгаль орчин, аялал жуулчлалын газраас жил бүр уламжлал болгон зохион байгуулж хэвшсэн дархан цаазат ховор амьтан болох аргаль хонинд зориулан нэмэлт өвс тэжээл, хужир тавьж өгөх арга хэмжээг Байгаль орчин, аялал жуулчлалын газрын албан хаагчид болон Уулзварын гол нөхөрлөлийн гишүүдтэй хамтран улсын тусгай хамгаалалттай Чойрын богд уул болон Хээнций нуруу зэрэг газруудад 2019 оны 01 дүгээр сарын 08 өдөр зохион байгууллаа.
Аргаль хонины хувьд өвөлжилтийн байдал харьцангуй хэвийн байгаа боловч ойр орчмын малын бэлчээрийн талхигдлын улмаас ялангуяа Хээнций нуруу орчмоор өвс тэжээл хомс байдалтай Чойрын богд уул орчим аргаль хонь их хужирсан шинжтэй байлаа. 2018 онд Чойрын богд ууланд дунд уулын амыг хашиж хамгаалан байгаль хамгаалагч тогтмол ажилласны үр дүнд тэр орчмын бэлчээр мэдэгдэхүйц сэргэж зэрлэг амьтан идээшин амьдрах орчин сайжирч байгаа нь ажиглагдаж байв.
Био-техникийн арга хэмжээнд нийт 10 хүн, 50 боодол өвс, 0,5 тонн хужрыг бэлтгэж зэрлэг амьтдын байршиж буй 12 байршил газруудад тараан байрлуулах ажлыг хийж гүйцэтгэсэн ба ажлын гүйцэтгэлд тусгай хамгаалалттай газрын байгаль хамгаалагчаар дамжуулан үр дүнд нь хяналт тавин ажиллаж байна.