2018 оны 04 сарын 28-ны өдөр аймгийн Засаг даргын нэрэмжит “Урлагийн наадам”-ын эхний 3 байрт шалгарсан шилдэг номеруудаас бүрдсэн “ГАЛА ТОГЛОЛТ” амжилттай болж өндөрлөлөө. Тус наадамд 70 гаруй байгууллагын хамтарсан 14 багийн тоглолт болж 600 гаруй ажилтан албан хаагчид оролцож өөрсдийн авъяас чадвараа сорин өрсөлджээ.
Наадмыг МУ-ын Ардын жүжигчин Д.Ухнаа, СУИС-ын хүндэт доктор, МУГЖ О.Ичинхорлоо, “Боржигин” чуулгын гоцлол дуучин МУСТА Р.Батболд нар шүүж, хөндлөнгийн ажиглагчаар Уртын дууч МУСТА Ш.Өлзийбат, МУСТА Г.Батсүх, НБХ-ийн мэргэжилтэн Ш.Түмэн -Өлзий нар ажиллаа.
Багийн нэгдсэн дүнгээр Шивээговь сумын ИТХ, ЗДТГ, сумын харьяа төрийн болон бизнесийн байгууллагуудын хамтарсан урлагийн баг 459.8 оноогоор тэргүүн байр эзэлж Засаг даргын өргөмжлөл, 1.0 сая төгрөгөөр, Төмөр замын байгууллагуудын хамтарсан Чойр зангилааны урлагийн баг 418.5 оноогоор дэд байрт шалгарч өргөмжлөл, 800.0 мянган төгрөг, аймгийн ИТХ, ЗДТГ, Аудитын газар, Орон нутгийн өмчийн газар, Сүмбэр сумын ИТХ, ЗДТГ, “Тохижилт Сүмбэр” ОНӨААТҮГ хамтарсан урлагийн баг 408.4 оноогоор гутгаар байрт шалгарч өргөмжлөл, 600.0 мянган төгрөгөөр тус тус шагнагдсан байна. Мөн 12 номинац тус бүрт эхний 3 байрт шалгарсан уран бүтээлчид, баг хамт олныг өргөмжлөл, мөнгөн шагналаар шагнасан юм.
Энэхүү урлагийн наадамд сэтгэл зүрх гарган бэлтгэж оролцсон байгууллага, хамт олон, үзэж сонирхон Говьсүмбэр аймгийнхаа авъяастнуудыг дэмжсэн үзэгчид, иргэддээ талархал илэрхийлье.
Уг наадамд ажлын болон бусад шалтгаанаар ороогүй аж ахуй нэгж, байгууллагын хамт олондоо дараа дараагийн арга хэмжээнүүдэд идэвхи зүтгэл, сэтгэл гарган оролцож байхыг уриалж байна. 
Та бүхнийг урлагийн тэнгэр Янжинлхам бурхан өнө мөнхөд ивээх болтугай.
