МЗЭ-ээс жил бүр уламжлал болгон зохиож оны шилдэг яруу найраг, шилдэг шүлэгчийг тодруулдаг “Болор цом” утга уянгын энэ их наадмыг ардын уран зохиолч Дэндэвийн Пүрэвдорж 1983 онд анх санаачлан зохиож “Хүн төрөлхтөнд хүргэх шүлэг”-ээрээ тэргүүлж байсан түүхтэй. Удаах жил нь Дөнгөтийн Цоодол “Нэр нь тодроогүй баатрууд”, дараа жил нь Бавуугийн Лхагвасүрэн “Шагнал” шүлгээрээ эл наадмын тэргүүн найрагчид болж тэр цагаас хойш ард түмний сэтгэл зүрхэнд хоногшсон олон арван найрагч эл наадмаас төрөн гарсан байдаг.
2005 онд анх хөдөө орон нутагт зохион байгуулагдах болсноос хойш долоо дахь аймагтаа хөшгөө нээж буй тус наадам Монголын Зохиолчдын эвлэлийн 90 жилийн ойн хүрээнд Монголын Зохиолчдын эвлэл, Говьсүмбэр аймгийн ЗДТГ, МҮОНТ, Монголын Үндэсний номын сан хамтран Говьсүмбэр аймгийн Чойр хотод зохион байгуулагдлаа.
Эгшиглэнт эхийн хишигт яруу найрагчийг тодруулах Боржигин голомт “Болор цом-36”-д нийт 140 уран бүтээлч шүлгээ ирүүлснээс 38 найрагчийн нэрс тодорсон билээ. Үүнээс гуравдугаар шатанд шилдэг 18 яруу найрагч шалгарсан. Шилдэг 18 найрагчаас дөрөвдүгээр шатанд есөн найрагч шалгарч үлдсэн юм. Мөн энэ жилийн наадамд Халимаг, Тува, Буриад, Өвөр Монголоос яруу найрагчид оролцлоо.
36 дахь болор цомын эзнээр Монголын зохиолчдын эвлэлийн шагналт яруу найрагч Б.Баттулга “Талархлын шүлэг” шалгарлаа. Тэрээр “Болор цом” наадамд өмнө нь найман удаа тусгай байр эзэлж байсан бол энэ удаа “Болор цом”-ын эзэн боллоо. Харин аман хүзүүнд яруу найрагч Би.Баярсайхан, гутгаар байрт яруу найрагч О.Цэнд-Аюуш, дөрөвдүгээр байрт яруу найрагч Д.Одгэрэл, айргийн тавд яруу найрагч Б.Жамбалдорж шалгарчээ.
