УИХ-ын гишүүн Г.Мөнхцэцэгийн санаачилсан “Их соёл-Их үндэс” хөтөлбөрийн хүрээнд Монголын Зохиолчдын эвлэл, Говьсүмбэр аймгийн ЗДТГ, МҮОНТ, Монголын Үндэсний номын сан хамтран зохион байгуулсан “Уран үгсийн чуулган” Боржигины голомт Говьсүмбэр аймагт нэгдүгээр сарын 04-нд боллоо.
Монголын Зохиолчдын эвлэлийн 90 жилийн ойг угтсан тус арга хэмжээ зохиолч уран бүтээлчдийг уншигч олонтой уулзуулж утга зохиол, яруу найраг, соёл, өв уламжлал, уран бүтээлийн тухай халуун яриа өрнүүллээ.
Энэ удаагын чуулганд зохиолчид хөтөлбөрийн дагуу гурван хэсэг хуваагдаж Баянтал, Шивээ Овоо, Сүмбэр сумын иргэд, утга зохиолын садан төрлүүдтэйгээ уулзаж шүлэг найргаа дуудаж, өгүүлэл зохиолын дээжээс хүргэсэн юм.
Уулзалтад ардын уран зохиолч Т.Галсан, Ардын уран зохиолч Б.Догмид, Төрийн соёрхолт, “Болор цом” наадмын тэргүүн байрын шагналт, яруу найрагч Ц.Бавуудорж, СГЗ, сэтгүүлч, яруу найрагч Ш.Гүрбазар, СГЗ, яруу найрагч Г.Аюурзана, СГЗ, яруу найрагч, Ай.Төмөр-Очир, СГЗ, яруу найрагч Х.Чилаажав, Д.Нацагдоржийн нэрэмжит шагналт, “Болор цом”-ын эзэн, зохиолч Жа.Баяржаргал, Д.Нацагдоржийн нэрэмжит шагналт, “Болор цом”-ын эзэн, яруу найрагч Б.Галсансүх, Д.Нацагдоржийн нэрэмжит шагналт зохиолч Ц.Буянзаяа, Д.Нацагдоржийн нэрэмжит шагналт, “Болор цом”-ын эзэн, яруу найрагч Б.Ичинхорлоо, МЗЭ-ийн шагналт, зохиолч Б.Сарантуяа, МЗЭ-ийн шагналт, “Болор цом”-ын эзэн, яруу найрагч Н.Гантулга, МЗЭ-ийн шагналт, “Болор цом”-ын эзэн, яруу найрагч Ц.Эрдэнэбаатар, МЗЭ-ийн шагналт, яруу найрагч М.Билэгсайхан, МЗЭ-ийн шагналт, яруу найрагч О.Цэнд-аюуш, МЗЭ-ийн шагналт яруу найрагч Н.Минжинсайхан зэрэг олон уран бүтээлчид оролцлоо.