Багш сурагчдын математик сэтгэлгээ, оюун ухааны болон сэтгэхүйн чадварыг хөгжүүлэх, олон улсын олимпиадад оролцох багш, сурагчдыг сонгон шалгаруулах зорилготой улсын математикийн 53 дугаар олимпиадыг Булган аймгийн Бугат сумын уугуул Монгол Улсын Гавъяат багш, математикийн ухааны доктор, профессор Д.Шагдарын нэрэмжит болгон зохион байгуулсан байна.
Тус олимпиадад аймаг, дүүргүүдэд явагдсан хоёрын давааны олимпиадаас эрх авсан багш, суралцагчид болон Улсын математикийн 52 дугаар олимпиадад эхний байруудад орсон багууд оролцож шилдгүүдээ тодруулжээ. Манай аймгаас оролцсон төлөөлөл Бага ангийн багшийн төрөлд Д.Нарангэрэл 6 дугаар байр, дунд ангийн багшийн төрөлд Г.Байгальмаа 25, 10 дугаар ангийн төрөлд Хонгорзул 26 байранд тус тус орсон байна.
Улсын математикийн 53 дугаар олимпиадыг Монголын математикийн олимпиадын хороо, Булган аймгийн Засаг даргын Тамгын газар, Боловсрол, соёл, урлагийн газар, “Шагдар багш” сан хамтран зохион байгуулж 21 аймаг 9 дүүргийн 42 баг оролцож оюун ухаанаа сорин өрсөлдсөн байна. Мөн манай аймгийн математик, физикийн багш нар тус олимпиадаас туршлага судаллаа.