Боловсрол, соёл, спортын салбарын орон нутаг дахь хөрөнгө оруулалтын ажлын явц, удахгүй болох элсэлтийн ерөнхий шалгалтын бэлтгэл, бусад тулгамдсан асуудлаар онлайн хурал хийлээ.
Уг хуралд Боловсрол, соёл, шинжлэх ухаан, спортын сайд Ё.Баатарбилэг, тус яамны болон харьяа байгууллага, Төрийн өмчийн бодлого, зохицуулалтын газар, Барилгын хөгжлийн төвийн удирдах ажилтнууд оролцож, 21 аймгийн ажлын мэдээллийг сонсож, тулгамдсан асуудлуудад нь хариулт өглөө.
Онлайн хуралд аймгийн Засаг дарга Г.Батсуурь, ЗДТГ-ын болон Боловсрол, соёл урлагийн газрын холбогдох дарга, мэргэжилтнүүд оролцлоо.
Элсэлтийн ерөнхий шалгалтын зохион байгуулалтын асуудлаар Боловсролын үнэлгээний төвийн дарга Ж.Ган-Эрдэнэ мэдээлэл хийж, сумаас аймгийн төв рүү ирж шалгалт өгөгчдийн аюулгүй байдалд онцгой анхаарах, нөөц цахилгааны эх үүсвэртэй байх, хүүхдүүд өөрсдөө харандаа, баллуур, үзүүрлэгч авч орохгүй байх ёстойг орон нутгийн удирдлагуудад мэдэгдлээ.
