Эрүүл мэндэд тустай гэх тодотголтой “Хар зайрмаг”-т “Хүнсний нэмэлтийн ерөнхий стандарт, MNS САС 192-2015”-д тусгагдаагүй хулсны нүүрс /vegetable carbon Black буюу Уголь растительный Е-153/ будагч бодисыг ашигласан, нянгийн бохирдол илэрсэн тул Мэргэжлийн хяналтын байгууллагаас тухайн үйлдвэрийн үйлдвэрлэсэн 3 тонн гаруй бүтээгдэхүүнийг хурааж, устгалд орууллаа. Үүнтэй холбогдуулан импортоор оруулж ирж буй тухайн нэмэлт агуулсан зайрмаг болон уг хүнсний нэмэлтийн импортлолтын байдалд хяналт тандалт хийхэд тухайн хүнсний нэмэлттэй зайрмагийг гурван компани импортолдог бөгөөд энэ онд 2 тонн импортлогдсон. Энэ төрлийн зайрмагийн орцонд ордог хүнсний нэмэлт /vegetable carbon Black буюу Уголь растительный Е-153/ нь Монгол Улсад одоогоор мөрдөгдөж буй “Хүнсний нэмэлтийн ерөнхий стандарт, MNS САС 192-2015”-д тусгагдаагүй, улсын бүртгэлд бүртгэгдээгүй тул тухайн хүнсний нэмэлтийг “Хүнсний тухай” хуулийн 16.1-д заасны дагуу Хүнс, Хөдөө аж ахуйн, хөнгөн үйлдвэрийн яамнаас улсын бүртгэлд бүртгүүлэх хүртэл хугацаагаар импортыг түр хязгаарлаад байна. МХГ-аас худалдаанд нийлүүлсэн бүтээгдэхүүнээ татан авах талаар үүрэг, чиглэл өгсөн бөгөөд татан авалт хийсний дараа устгалд оруулах юм. Иймд хэрэглэгч та энэхүү зайрмагийг авч хэрэглэхгүй байхыг сэрэмжлүүлж байна. Мөн энэхүү бүтээгдэхүүнийг худалдан борлуулж буй худалдаа үйлчилгээний газрууд уг зайрмагийг буцаан татан авалт хийх, худалдан борлуулахгүй байхыг Анхааруулж байна. ХЧСХ улсын байцаагч Ф.Болорцэцэг
