Говьсүмбэр аймгийн Төрийн байгууллагууд үйлчлүүлсэн иргэдээс сэтгэл ханамжийн судалгааг анх удаа мессежээр авч эхэллээ. Тус аймгийн Улсын бүртгэлийн хэлтэс, Татварын хэлтэс, Мэргэжлийн хяналтын газар, Авто тээврийн төв гэсэн 4 байгууллага хамтран уг үйлчилгээг үйлчилгээндээ нэвтрүүлжээ. Үйлчлүүлсэн иргэний бүртгэлтэй буюу, үйлчилгээ авахдаа бүртгүүлсэн утсанд “Та сэтгэл ханамжаа 1-5 оноогоор илэрхийлнэ үү” хэмээн мессеж ирэх бөгөөд иргэн хариу мессеж илгээснээр тухайн ажилтны хандлага, харилцаа, үйлчилгээг дүгнэх юм байна. Мөн уг утсанд иргэд үйлчилгээтэй холбоотой санал, хүсэлтийг мессежээр явуулж болох бөгөөд таны саналыг үйл ажиллагаандаа нэвтрүүлэн ажиллах аж. Өмнө нь Мобиком, Юнител зэрэг үүрэн холбооны операторууд үйлчлүүлсэн иргэдээсээ мессежээр санал авдаг байсан бол төрийн байгууллагуудаас анх удаа Говьсүмбэр аймгийн төрийн үйлчилгээний байгууллагууд уг үйлчилгээг үйл ажиллагаандаа ийнхүү нэвтрүүлжээ.
