Боржигин уламжлал, зан заншил, өв соёлыг өвлүүлэн дэлгэрүүлэх зорилгоор “Боржигин морин хуур, Уртын дуучдын” уралдааныг жил бүр уламжлал болгон зохион байгуулж биет болон биет бус өв тээгчдийг тодруулан алдаршуулж урамшуулах ажлыг зохион байгуулж хэвшснээр өв соёлоо хадгалж хамгаалах ажилд ахиц гарч байна.
2018 оны 12 сарын 19-ны өдөр Баянтал сумын “Боржигин морин хуур, Уртын дуучдын” дугуйлан тайлан тоглолтоо хийлээ. Тус тоглолтонд Говьсүмбэр аймгийн ЗДТГазрын дарга Д.Содном, Баянтал сумын Засаг дарга Д.Мөнх-Эрдэнэ, Баянтал сумын ЗДТГазрын дарга Д.Отгонжаргал нар болон эцэг эхчүүд, сургуулийн захиргаа оролцлоо.
Тост боржигины соёлын үнэт өв боржигин морин хуураар хүүхэд багачууд суралцан тоглож байгаа нь өв соёлоо хадгалж хамгаалахад чухал нөлөө үзүүлж байна.
Тус тоглолтын үеэр Баянтал сумын хөгжмийн багш Л.Гантөгсд “Боржигин өв соёл”-ыг түгээн дэлгэрүүлэхэд үнэтэй хувь нэмэр оруулж Боржигин морин хуураар хуурдахыг хүүхэд залуучуудад заан сургаж байгаа хөдөлмөрийг нь үнэлж Говьсүмбэр аймгийн Засаг даргын Тамгын газраас өргөмжлөл, мөнгөн шагналаар шагнав.
Мөн “Боржигин өв соёл”-оо өвлөн авч Боржигин морин хуурынхаа ая эгшигийг уянгалуулан суралцаж байгаа хүүхдүүдэд талархал, гарын бэлэг гардууллаа.